ماينفعش يا أختي !

السلام عليكم و رحمة الله و بركاته

كلامي .. ليكِ إنتِ يا أختي المسلمة ..
ليكِ إنتِ يا أختي الملتزمة

مــايـنـفـعـش يا أختي

تكوني ملتزمة في شكلك وملابسك وانتِ أصلا قلبك خالي من الالتزام !

مــايـنـفـعـش يا أختي

يكون كلامك كله بيدل على إلتزامك وانتِ مالتزمتيش في شكلك وفي حجابك !

مــايـنـفـعـش يا أختي

تقولي أنا ملتزمة وانتِ كلك تقصير وكسل وخمول عن طاعة ربنا وحفظ القرآن وطلب العلم !

مــايـنـفـعـش يا أختي

تقولي أنا ملتزمة وبعدين تعاملي الناس بضيق صدر وسوء خلق !

مــايـنـفـعـش يا أختي

تتعاملي مع الناس بكل طلاقة وود ، وتعاملي أهلك في البيت بالشدة والعقوق !

مــايـنـفـعـش يا أختي

تجلسي على النت بالساعات الطويلة تتصفحي المنتديات وانتِ وراكِ ورد قرآن لازم يخلص
أو وانتِ وراكِ مهمة لازم تخلص دلوقتي وانتِ بتسوفي وتأجلي ..
يا حبيبتي الوقت غالي !

مــايـنـفـعـش يا أختي

تنجحي في طلب العلم الشرعي وتكوني فاشلة في باقي جوانب حياتك !

مــايـنـفـعـش يا أختي

تعيشي وانتِ مالكيش هدف في الحياة !

مــايـنـفـعـش يا أختي

تنتقبي وتقولي إنك ملتزمة وبعدين ربنا يكرمك وتتزوجي أخ ملتحي .. وتفتكري إنك بكدا حققتِ هدفك في الحياة وخلاص !

صدقيني ما ينفعش

انتِ فين التزامك ؟ فين هدفك في الحياة ؟
فين همة الأخوات الملتزمات العالية اللي بيضرب بيها الأمثال ؟

يا أختي التزامك في طاعتك لربنا .. في التزامك لأوامره واجتنابك نواهيه
في مسارعتك في أعمال الخير .. في سباقك للحاجات اللي تعليكِ في الدنيا والآخرة
تحفظي قرآن .. تطبقي السنة .. تطلبي علم شرعي .. تعودي نفسك حسن الخلق ..
تكوني أخت ملتزمة ..
أخت بجد مش أخت أي كلام
أخت عالمة متفقهة مش أخت كل همها مظهرها وبس !
أخت ملتزمة ظاهرا وباطنا
أخت دماغها عالية مش بتفكر بسطحية وسذاجة !

هو ده المفروض يكون هدفك في الحياة .. هو دا اللي المفروض تحققيه

خليكِ قريبة من ربك .. وعيشي حياتك صح .. وخلي التزامك صح .